गायक फत्तेमानको स्टुडियो रेकर्डेड पहिलो एकल एलबम
‘गायक फत्तेमान ७०मा ’
श्रोता सामु छिट्टै आउने
फत्तेमान
गायक फत्तेमान नेपाली सङ्गीत साधनाका जिउँदा इतिहास हुन् । उनको ओजिलो आवाज सुन्दा यस्तो लाग्छ, उनी नेपाली हृदयभित्रका आँसु, हाँसो, विरह र आशाका सम्पूर्ण अभिव्यक्ति हुन् । उनका सरल गीत र गहन अभिव्यक्तिले सङ्गीतका पारखीलाई त लठ्याउँछ नै । त्यस बाहेक सङ्गीतमा रुची राख्ने जो कोहीलाई पनि उनको ओजिलो आवाजको माधुर्यले घण्टौं बाँध्न सक्छ । फत्तेमानले गीत गाइरहँदा सुन्नेहरूलाई यस्तो लाग्छ, उनको मधुर कण्ठको माध्यमबाट सुन्नेहरूको आफ्नै आन्तरिक कथा उजागर भैरहेछ ।
रेडियो स्थापनाको प्रारम्भकाल, २०१८ सालतिर फत्तेमानले रेडियोमा प्रत्यक्ष गायनमार्फत् आफ्नो आवाजलाई श्रोता सामु पुर्याए । त्यही आवाज भजनमार्फत् २०२० मा रेकर्ड भयो । सङ्गीतकार नातिकाजीले तयार गरेको भाकामा यादव खरेलको गीत यस्तो पनि हुँदो रै’छ(२०२५) ले फत्तेमानलाई वर्षका उत्कृण्ठ गायक मात्र बनाएन, लोकप्रियताको उच्च शिखरमा पनि पुर्यायो । फत्तेमानले जीवनका ७० बसन्त पार गरी सक्दा पनि आफ्नो कण्ठको माधुर्यलाई अझै तिखारिरहेकै छन् । नयाँ–नौला सिर्जना गुनगुनाइरहेकै छन् । शिखरमा पुगेको उनको त्यही युगान्तकारी लोकप्रियता यद्यपि कायम छ ।
गायक फत्तेमान ७० मा
फत्तेमानको सङ्गीत यात्रा नेपाली–अधुनिक सङ्गीतको प्रारम्भिक कालमै शुरु भएको हो । रेडियोको स्थापनासितै नेपाली सङ्गीतको पहिचान खोज्दै हिंड्ने अनेकौं साङ्गीतिक यात्रीहरू बीच फत्तेमानको मौलिक पहिचान छ । फत्तेमानको समय सङ्गीतलाई भक्ति र शोखको रुपमा अपनाउने समय थियो । त्यसैले त्यो बेलाका कलाकारहरूमा ब्यावसायिक प्रतिस्पर्धाले खास स्थान पाउँदैनथ्यो । त्यसबखतका कलाकर्मी आत्मरञ्जनमा बढी रम्थे । फत्तेमान पनि लामो समय यही आत्मरञ्जनमा रमाए । एकान्तमा एक्लै गुनगुनाइरहे ।
सन् २००२ मा फत्तेमानको साङ्गीतिक जीवनले एउटा सुखद मोड भेट्यो । मोडमा ब्यवस्थापन संस्था नेपा~लय र साङ्गीतिक कलाकार आभास भेट भए । वर्षौं अल्पेका फत्तेमान एकपटक फेरि साङ्गीतिक चर्चाको विषय बने । प्रत्यक्ष गायनले (Live performance) फत्तेमानलाई साङ्गीतिक संसारमा फेरि एकपटक पुनः परिचित गरायो । नेपा~लयर आभाससित फत्तेमानको सङ्गत प्रगाढ हुँदै गयो । फत्तेमानलाई नयाँ सिर्जनामा स्वरवद्ध गर्न नेपा~लयर आभासबीच अनेकौं सु–छलफल सम्पन्न भए । आभासले आफूसित भएका नयाँ सिर्जनालाई फत्तेमानका निम्ति संयोजन(Arrangement) गर्न थाले । नेपाली–आधुनिक शैलीमै सिर्जनारत आभासलेMIDIप्रविधिमा सङ्गीत संयोजन प्रारम्भ गरे । महिनौंको मेहनत पश्चात धुनका असली मुहार कोरिए । नयाँ सिर्जनालाई मूर्तरुप दिन फत्तेमान र आभासले अनेकौं पटक आफूहरु सामु हार्मोनियमलाई गुञ्जाए ।MIDI Programming मा रहेका अधिकांश विद्युतीय आवाजका(Digital sound) ठाउँमा मौलिक वाद्ययन्त्र(Acoustic instrument) लाई पुनःर्थापन गरिए । जीवनको उत्तरार्धमा पुगेका फत्तेमानले कयौं बिहानी आफूलाई स्टुडियोमा ताजा रुपमा प्रस्तुत गरे र नयाँ सिर्जनामा आफ्नो स्वरमाधुर्य भरे । तिनै आदरणीय गायक फत्तेमानको ‘सुनौलो आवाज’(Golden voice) मा अङ्कित नौलो सिर्जना “गायकफत्तेमान ७० मा ” अब श्रोताहरु सामु आउने पूर्व तयारीमा रहेको छ ।
